حوار دار بين اثنين موظفين في وحده من الشركات (الخاكومية) في دبي، الأول شرق آسيوي (هندي) والثاني مواطن. لكن قبل ما أدخل في الحوار لازم أعطيكم خلفيات عنهم قبل ما يشتغلون في الشركة. المواطن من عايلة متوسطة، عنده أربع إخوان, ويتقاسم الغرفة مع واحد منهم في واحد من البيوت الشعبية القديمة. يزط ثلاث وجبات أساسية يومياً، وطبعاً بين كل وجبة ووجبة في مأكولات خفيفة. خلّص الثانوية وحصل على نسبة 58% مع مرتبة الشرف, ويلس بطّالي لمدة سنة ونص لين ما قام سوقه ولقى وظيفة في الشركة إياها.

الهندي من عايلة متوسطة أقرب للفقيرة، يتقاسم الغرفة مع سبعة من إخوانه وعيال عمه، في بيت قديم في أحد فرجان بمباي. ياكل وجبة وحدة رئيسية في اليوم وباقي الوجبات تكون خبز براته وشاي (تتكون الوجبة الرئيسية غالباً من الدال والسبزي). خلّص دراسته وقرر إنه يشتغل في وحده من دول البترول, لأنه عارف السالفة إذا اشتغل في بلاده بعيش فقير وبيموت أفقر. وقام حظه ولقى وظيفة في مدينة الهنود الفاظلة، في نفس الشركة اللي يشتغل فيها ابن عمه اللي سوّاله الترتيب (واسطة).


حالة الهندي والمواطن بعد ما اشتغلوا في الشركة سنة 2003: المواطن درجة سابعة ومعاشه 6000 درهم. تطور وسكن في غرفة روحه بعد ما قسم الحجرة الأولية نصين مع أخوه. عنده نيسان صني موديل السنة, ويدفع 2000 درهم شهرياً أقساط، غير المصروفات الثانية. أما الهندي درجة سابعة ومعاشه 4250 درهم. تطور وسكن في غرفة مع أربع هنود غيره. يدفع 200 درهم إيجار (أجار الغرفة 1000 درهم شهريا). ما عنده سيارة, لكنه ربح سيكل في مهرجان الهنود للتسوق, وقام ياكل وجبتين وساعات ثلاث في اليوم.

سنة 2005 تلاقى المواطن والهندي في وقت الاستراحة. وطبعاً بعد السلامات والكلام الفاظي واليومي، دار الحوار التالي:

الهندي وهو يزفر زفرة كأن روحه بتطلع: هيييه... يا حظكم انتو يالمواطنين, حكومتكم ما قصرت معاكم, وعطتكم كل شيء, وريحتكم عالآخر.

المواطن وهو يتنهد: الحمدلله, الحكومة ما قصّرت، لكن نحنا مب مرتاحين مثل ما إنت تتخيل.

ابتسم الهندي وقال: يعني إنت مب مرتاح وإنت ساكن بلاش وعندك سيارة وتستلم راتب أوكي وعايش مع أهلك ومب متغرّب مثلي.

المواطن وهو معصّب: البيت اللي ساكن فيه مب بيتي, بيت أبوي, وأعتقد أنت يوم كنت في بلادك, أبوك ما كان ياخذ عنك أجار، والسيارة اللي تشوفني فرحان فيها ثلث الراتب. وبعدين إنت كيف متغرب والهنود اللي موجودين في الدولة أكثر عن المواطنين؟ والله نحنا اللي متغربين. ساعات أشتاق أشوف مواطن في الشارع وما حصل إلا ربعك.

الهندي وهو يبتسم عشان ما ينظرب: ياخي ليش تشتري سيارة؟ ليش ما تركب الباص؟ بيطلع عليك أرخص بوايد، بس اسمح لي أقولك انتو المواطنين مسرفين وما تمسكون البيزات. وبالنسبة للهنود الموجودين صح يخففون الغربة, لكنهم ما يغنوني عن أهلي.

المواطن: أنا مواطن ولازم يكون عندي سيارة مدام اشتغلت، وهذا الشي مب أنا اللي اخترعته، هذا من المظاهر اللي انكتبت عليّ. في عمرك شفت مواطن كاشخ ومتزكرت وراكب الباص وساير السيتي سنتر؟ وبعدين هذي الأشياء أنا اتربيت عليها، يعني إنت تقدر تمشي يومك في الباصات لأنك ترعرعت فيها. ومب بس السيارة هي المشكلة، مثلا إنت تقدر تمشّي حالك ببراته وشاي كرك، لكن أنا ما أقدر, فكيف بعد ما تربيت على السيريلاك, وبعده الكورن فلكس، والعيش واللحم والدياي، تباني آكل براته فوقه شكر. وصح ان الهنود اللي موجودين ما بيغنونك عن أهلك, لكن الفلوس اللي بتطلعها بتغنيك وبتغني أهلك بعد. ويوم بترد بلادك بتعيش مرتاح وأحسن بوايد من قبل يوم كنت عايش مع أهلك.

الهندي: صح إني يوم برد برتاح, لكني الحين تعبان، وعلى الأقل انتو من الحين مرتاحين وعندكم كل شي.

المواطن: إنت يوم وصلت دبي كنت ضعيف لأنك ما كنت لاقي تاكل, والحين ما قادر تشل عمرك من المتن، وهذا معناته ان مستواك المعيشي تحسن, ويوم بترجع بيتحسن أكثر. لكن أنا المواطن حالتي ومستواي بيكون من زفت لأزفت, وخلني أفهمك كيف!.

الهندي وهو يتثاوب: كيف؟

المواطن: افرض ان كل واحد فينا حط ألفين درهم شهريا، بعد عشر سنوات كم بيكون عندنا؟

الهندي وهو يفكر ويحسب: 2×12=24 ألف درهم في السنة. و24×10=240 ألف في عشر سنوات. المواطن: حلو. افرض انك رديت بلادك وإنت عندك 240 ألف درهم، شو تقدر تسوي؟

الهندي: 240 ألف أقدر أشتري بيت وأتزوج, ويمكن أسوي مشروع صغير مثل مطعم أو خياط أو غيره.

المواطن: بعد عشر سنوات وأنا عندي 240 ألف يادوب أقدر أتزوج وأجر شقة في دبي وأثثها, هذا إذا كان الزواج والشقة والأثاث بعد عشر سنوات يكلفني بس 240 ألف.

الهندي وهو مستغرب: ليش الزواج عندكم هالكثر غالي؟ عندنا تقريبا بلاش.

المواطن: كل شي غالي حقنا نحنا المواطنين المساكين وحقكم انتو رخيص. يعني مثلاً يوم تسير تتحلق كم ياخذ عنك الحلاق؟

الهندي: لحية وشعر ياخذ عني 15 درهم, وإذا سولفت وياه يمكن عشر, وإذا كان من جماعتنا ببلاش.

المواطن: أنا أدفع 25, وإذا سولفت واستويت أوكي وياه يدفعني 40 درهم. وتقدر تقيس الحلاق على كل شي ثاني من مطاعم وملابس وغيره، لأني مواطن والتجار اللي في السوق مثلك انت يتخيلون المواطنين ملوك وعندهم كنوز في البيت خاشينها تحت الكاشي. وهذا يعني إن العلاوة اللي أنا أحصلها وأنت لأ, وهي علاوة المواطن تطلع عليّ أغلى من بيع السوق.

الهندي: ...

المواطن وهو ينهي الموضوع: بالمختصر سنة 2015 بتكون انت متزوج وعايش بين أهلك وعندك بيت ملك وتشتغل ومستانس ومكيّف عالآخر. لكن أنا سنة 2015 متزوج وعايش في عجمان, ومتغرب عن أهلي لأني ما أقدر على الشقة اللي في دبي, وعندي نيسان صني موديل 2003 لأني ما أقدر أشتري غيرها، وعندي الضغط والسكري والقلب لسببين: الأول الزحمة من عجمان لدبي (مقر عملي)، والثاني صاحب العمارة (الوافد العربي) اللي بيطالبني بإيجار الشقة.

يقوم المواطن والهندي وياه ويردون للشغل. وهم ماشين يقول الهندي بكل حب وحنان وعطف وندم: آسف، أنا غلطان، والحمدلله اني هندي.

ملاحظة: دار الحوار باللغة (الإنجلوهندربية). ترجمها إلى العامية مواطن يفكر في الهجرة للهند.